खात्याच्यो कार्यावळी
राजभाशा कायदो 1987 प्रभावी रितीन चालीक लावपा खातीर सरकारान सल्लागार मंडळाची स्थापना केल्ली. राजभाशा मंत्र्यांचे अध्यक्षते खाला हो मंडळ घडयल्लो. राजभाशा कायदो प्रभावी रितीन चालीक लावप तशेंच वेगवेगळ्यो येवजण्यो, उप-समित्यो, कर्मचार्यांची आवश्यकताय, हेर राज्यांनी चालीक लायिल्ल्या भाशा धोरणांचो अभ्यास करप ह्या सारकिल्या विशयांचो अभ्यास करून सरकाराक सल्लो दिवपाचें काम मंडळाचें आशिल्लें. मंडळाचो कार्यकाळ, ही अधिसुचोवणी राजपत्रांत छापून येवपाच्या दिसा सावन, तीन वर्सांचो आशिल्लो आनी गरज आसल्यार तज्ञा सयत हेर वांगड्यांक मंडळांत आसपावून घेवपाचो अधिकार तांकां आशिल्लो.
ह्या संचालनालयान पांच वेगवेगळ्यो अधिसुचोवण्यो काडल्यात, जातूंत राजभाशा कायद्या अंतर्गत राजभाशा कोंकणी तशेंच मराठी भाशेचो वापर पांच वेगवेगळ्या कामां खातीर दिला, ते म्हणल्यार, 1) नाम फलकां लावप 2) आपोवणें पत्रां छापप 3) रस्त्यांचेर / मार्गांचेर नांव/सुचना फलकां लावप 4) देवस्थान / कम्युनिदादींच्यो राजपत्रांत नोटिसो आनी 5) पुलिसा मुखार जबानी नोंद करप.
संचालनालयाचो मुखेल वावर सकयल दिल्ल्या प्रमाणें आसा-
अ) राजभाशा कायदो 1987 आनी ह्या कायद्या खाला जारी केल्ल्यो अधिसुचोवण्यो चालीक लावप.
आ) राज्य सरकाराचें भाशा धोरण चालीक लावप.
इ) प्रशासन तशेंच गिन्यानाच्या हेर मळांचेर राजभाशेचो चडांत चड वापर जावचो म्हूण पावलां उबारप.
ई) वेगवेगळ्या येवजण्यां वरवीं कार्यशाळा, परिसंवाद, आनी हेर आयोजीत करून प्रशिक्षण दिवप.
उ) कोंकणी, मराठी आनी हिंदींतल्यान जापो दिवप सवकळीचें जावचें म्हूण सरकारी / निम सरकारी कर्मचार्यांक संगणकाचेर देवनागरी लिपयेंत टंकलेखन करपाचें प्रशिक्षण दिवप.
हेर वावर-
1. हेर सरकारी खात्यांतल्यान आयिल्ल्या वेगवेगळ्या दस्तावेजांचो अणकार कोंकणी/मराठी/हिंदी/पुर्तुगेज भासांनी करप, देखीक उदरगतीच्यो येवजण्यो, आपोवणें पत्रां, विधानसभेचे प्रस्न, वेंचणुके संबंदीची माहिती, प्रसिध्दी पत्रकां, नागरिकांचो अधिकार-पत्र, न्यायालया संबंदीचीं प्रकरणां, कायदे आनी नेम आनी हेर.
2. तालुक्या पांवड्यांचेर आशिल्ल्या सगळ्या सरकारी कर्मचार्यांक तशेंच गोंयांत नेमणूक जाल्ल्या सगळ्या भारतीय सेवा अधिकार्यांक कोंकणी भाशेचें प्रशिक्षण दिवप, ज्या वरवीं प्रशासकी कामां खातीर कोंकणीचो वापर करूंक तांकां सोंपें जातलें.
3. कारकुनी कर्मचारी वर्गाक देवनागरी लिपयेंत संगणकाचेर टंकलेखनाचें प्रशिक्षण दिवप होवूय वयर दिल्ल्या प्रशिक्षण कार्यावळीचो भाग आसा.
4. तरेकवार विशयांनी वेगवेगळ्यो शब्दावली कोंकणींत तयार करप, देखीक, प्रशासकी, कायद्याची, विधिमंडळ, लोकवेद, अर्थीक-वित्तीय, वैजकी, ग्रंथालय परिभाशीक उतरावळ कोश, शिक्षणीक, प्रसार माध्यम, साहित्या संबंदीत शब्दावली/शब्दकोश, पर्यावरण विज्ञान, वैजकी विज्ञान आनी जागृताय संबंदीत उतरावळ, झाडां संबंदीत उतरावळ आनी हेर.
5. राजभाशा आनी हेर प्रादेशीक भासो परिणामकारक रितीन चालीक लावंक वेगवेगळ्यो येवजण्यो चालीक लावप.
6. राजभाशा आनी हेर प्रादेशीक भासो परिणामकारक रितीन चालीक लावंक अनुवाद, संपादन, मुद्रण तपासणी, पुनरिक्षण आनी हेर विशयांचेर कार्यशाळा, परिसंवाद, कार्यावळी आयोजीत करप.
7. कोंकणी भाशेच्या विकासा खातीर गोवा कोंकणी अकादेमीक आनी मराठी भाशेच्या विकासा खातीर गोवा मराठी अकादमीक आवर्ती अनुदान दिता.
8. दाल्गाद कोंकणी अकादेमी, कोंकणी भाशा मंडळ आनी अखिल भारतीय कोंकणी परिशद हांकां संबंदीत भाशेच्या प्रसाराक लागून केल्ल्या वावरा खातीर आधाररुपी अनुदान दिता.
9. वेगवेगळ्या सरकारी खात्यांनी गरज आसता तेन्ना दीसपट्ट्या प्रशासकी पत्रवेव्हारांत राजभाशेचो वापर करपा खातीर राजभाशा संचालनालय केंद्रक (नोडल) प्राधिकरण म्हूण वावर करता.
10. राजभाशा तशेंच भारतीय घटनेच्या आठव्या परिशिश्टांत दिल्ल्या भाशेच्या वेव्हारा खातीर राजभाशा संचालनालय भारत सरकाराचें केंद्रक अभिकरण आसा.
11. सगळीं सरकारी संकेतथळां भोव-भाशीक करप (कोंकणी, मराठी, इंग्लीश आनी हेर)
12. विधानसभेच्या वेगवेगळ्या दस्तावेजांचे कोंकणींत आनी मराठींत अणकार करप. तशेंच कोंकणींतल्यान विधानसभा कामकाज चलोवंक सभापतींच्या कार्यालयाक सहकार्य दिवप.
13. नाम-फलक, नांवांचे तकटे आनी हेरांचो कोंकणींत आनी मराठींत अनुवाद करप.
14. सरकारी खातीं / भौशीक क्षेत्रांतलीं उपक्रमां / महामंडळां / हेर संघटणां आनी हेरांक कोंकणी,मराठी,हिंदी,पुर्तुगेज, इंग्लीश हे स्त्रोत भाशेंतल्यान लक्ष्य भाशेंत अनुवाद करून दिवंक खासगी अनुवादक पॅनलाची स्थापना केल्या.
